Entri yang Diunggulkan

SERAYU-MEDIA.COM: Novel : Pusaka Kembang Wijayakusuma (26)

SERAYU-MEDIA.COM: Novel : Pusaka Kembang Wijayakusuma (26) : “Dari mana Dinda Sekarmenur mendapatkan perlengkapan ranjang tempat tidur yang ...

Rabu, 29 Juni 2016

Wayang Kulit Banyumasan : Sumpahe Rama Parasu (04-Tamat)



Sumber gambar : wayang.wordpress.com


Sawise bisa nyedani Prabu Arjuna Sasrabahu, Rama Parasu banjur bali maring padepokane. Rasane marem banget wis bisa nyedani Ratu Mahespati sing wis kumawani murang tata lan ngusak kasuciane Padepokan Maharsi Jamadagni. Sapi Nandini  pusaka ingon-ingone iya wis bisa digawa bali maning.

Kosokbaline kahanan Kerajaan Mahespati,  putra-putrane Prabu Arjuna Sasrabahu  jengkel banget, deneng koh  ramane seda  ora nang peperangan, tapi seda nuju numpak kreta, ora ngira yen diudani panah nang mungsuhe. Padahal tumrap satria, mati nang medan peperangan kuwe mati sing luwih utama, dadi idam-idaman lan darmaning para satria utama. Mulane putra-putrane Prabu Arjuna Sasrabahu banjur nduwe niat arep males  sedane ingkang rama. 

Prabu Arjuna Sasrabahu karo Dewi Citrawati ora kagungan putra. Putra-putrane miyos sekang garwane sing disit yakuwe  Dewi Citranglangeni, putrine Prabu Citrawiria, Ratu Tunjungpura. Putrane sing mbarep ngganteni jumeneg ratu Mahespati, jenenge Prabu Ruryana,ngemban pusaraning praja Mahespati dibantu adi-adine kabeh. Ora let antara suwe sawise Kerajaan Mahespati rampung anggone bela sungkawa, putra-putrane Prabu Arjuna Sasrabahu pada rembugan arep males sedane ingkang rama. Kelakon temenan, putra-putrane Prabu Arjuna Sasrabahu nekani padepokane Maharsi Jamadagni wayah esuk. Nanging ya ndilalah, Maharsi Jamadagni pancen wis  pinesti isih kudu nampa bilahi sing ping pindone, ngunduh wohing pekeri, sebab wis tau mateni bojone Dewi Renuka, senajan banjur diuripna maning. 

Wektu kuwe jan-jane Maharsi Jamadagni ya wis mandan sehat, setitik-setitik wis  gelem maring sanggar, senajan mung sedela-sedela. Sing sering  unggal  esuk jalan-jalan nang  kebon sekeliling padepokan kur kanggo mbalekna kesehatanne sing durung patia mari banget. Esuk dina kuwe, kaya biasane putra-putrane lima kabeh wis pada mangkat maring alas, dadi padepokan pancen sepi, mung dijaga cantrik piket sing jumlahe ora patiha akeh. Mesti bae Maharsi Jamadagni kaget banget bareng ketekan para putra-putrane Prabu Arjuna Sasrabahu sing garep males patine ramane. 

Tekane putra-putrane Prabu Arjuna Sasrabahu  sing diiringi prajurit pengawal nang padepokane Maharsi Jamadagni, langsung gawe kerusakan, ngamuk nendangi apa bae sing bisa di tendang, kaya lawang, kursi, meja, dingklik, lincak. Kabeh pada ditendangi karo diguling-gulingna, kabeh kuwe ndadekna keributan nang padepokan. Cantrik jaga sing nyoba arep ngalang-alangi, langsung disingkirna. .Wit-witan sing ana nang latar padepokan lan kebon iring kiwe lan iring tengen padepokan ya pada dipenclasi, melu bae dadi korban amukan. Maharsi Jamadagni sing lagi mlaku kedimik-kedimik nang kebon, ditangkep nang putra-putrane Prabu Arjuna Sasrabau, terus bae diseret, dipilara,lan diantemi.

”Lha kiye Maharsi ramane sing nyedani Kanjeng Rama, ayo ganti dipateni bae,” salah siji putrane Prabu Arjuna Sasrabahu ngomong kaya kuwe kambi nyekel keris pusaka kraton Mahespati.


Keris pusaka sing luk sewelas, klakon disudukna dadane Maharsi Jamadagni, tembus maring walikat, dadi lan sedane sang Maharsi. Sawise ngroyok Maharsi Jamadagni lan ngrusak padepokan, putra-putrane Prabu Arjuna Sasrabahu karo prajurit pengawale banjur bali maring Mahespati, ninggalna padepokan. Sanggar padepokan ora dirusak, semono uga Sapi Nandini, ya dijorna bae nang kandang, ora diganggu. Dewi Renuka oleh pitulangane Dewa, ya slamet maning, bisa lolos sekang padepokan nusul putra-putrane sing lagi mbukak sawah lan tegalan anyar nang tengah ngalas .


Orat let suwe saungkure para satriya Mahespati ninggalna padepokan, Maharsi Rama Parasu  tekan  nang padepokan, kaget banget ndadekna kejoting penggalih bareng ndeleng kahananing padepokan sing pada morak marik ora karuan. Apamaning bareng weruh ingkang rama Maharsi Jamadagni, njrebabah  ngrungkebi bantala awutah getih, wis seda dadi layon.


Rama Parasu kaget banget ndadekna kejoting penggalih bareng ndeleng kahananing padepokan sing pada morak marik ora karuan. Apamaning bareng weruh ingkang rama Maharsi Jamadagni, njrebabah  ngrungkebi bantala akutah getih, wis seda dadi layon. Rama Parasu banjur mlayu ngrungkebi layone ingkang bapa kambi muwun, atine banget keranta-ranta. Apa maning bareng kakang-kakange pada  teka  karo ibune, padepokan sekal  dadi udan tangis.


Nanging bareng wis lilih sungkawane  penggalihe, Rama Parasu banjur ngrumat layone ingkang rama, dibantu kakang-kakange, lan para cantrik padepokan. Para brahmana lan para tapa iya banjur pada rawuh. Layone Maharsi Jamadagni,  didokok nang panggonan upacara pengobongan, banjur di obong. Genine  ngalad-alad sundul langit, madangi jagad sakeliling padepokan.


Maharsi Rama Parasu banjur ngadeg  mandeng geni sing  ngalad-alad  karo ngendika seru suarane, ”Heh, para satria kabeh sing  ana nang salumahing bumi, aku Rama Parasu ora rila banget deneng sedane ramaku kanthi kineroyok dening para satria. Mulane aku prasetia, wiwit dina siki, aku arep males ukum marang kabeh satria. Aku prasetia, arep tek tumpes kabeh  satria sing ana nang salumahing bantala.”


Kaya kuwe sumpahe Rama Parasu  sing nganggep para satria kuwe senengane mung perang, ngutahna getih, lan dadi leleteking jagad. Ora bakal ana alam dunya sing tata-tentrem  selagine isih ana golngan satria  sing urip nang salumahing bumi. Sumpahe Rama Parasu keprungu dening para dewa sing nang Suralaya melu dadi saksi, ndadekna ana gara-gara. Bumi gonjang-ganjing, gunung moyag-mayeg, lautan mawalikan kaya kinebur, lintang kelap-kelip, ndaru karo teluh braja pada pating clorot ngebeki langit. Rama Parasu banjur winisuda ngganti  palenggahane Maharsi Jamadagi, dadi pimpinan paling duwur padepokan. Ya wiwit wektu kuwe, Rama Parasu ganti jeneng, nunggak semi jenenge ramane, yakuwe Maharsi Jamadagni Enom. Angger cara barat ya Maharsi Jamadagni Yunior. Ramane sing wis seda, sinebut Maharsi Jamadagni Senior. Sawise  acara pakurmatan layone ramane wis rampung kabeh, Rama Parasu nyandak senjata kampak pusaka klangenane, banjur lunga metu sekang padepokan, kanti tekad arep numpes kabeh satria sing bisa ditemokna.


Kraton sing ditekani disit dewek, mesti bae kraton Mahespati. Saben ketemu satria ora nganggo ditakoni, langsung bae, mak bres! Digebug nganggo kampak sing landepe nggegilani banget. Kabeh satria Mahespati, putra-putrane Prabu Arjuna Sasrabahu lan kabeh keturunane entong disirnakna kabeh, tinumpes dening  Rama Parasu, tanpa ana wong sing bisa ngendegna, nyegah, apa maning nglawan. Saking banget telitine anggone numpes para satria keturunane Prabu Arjunasrabahu, aja nganti ana sing kesingsal lan isih urip, Rama Parasu  ngubengi Kraton Mahespati lan kabeh wewengkon negara Mahespati nganti ambal kaping telu. Sedalan-dalan Maharsi Rama Parasu persasate ora liren-liren bola-bali mateni para satria. Mulane nang negara Mahespati, banjur wis ora nana satria siji-sijia, kabeh wis ditumpes tapis nganti entong.


Bareng nang Mahespati wis ora nana satria, Rama Parasu banjur nekane keraton-keraton para satria sing nang sekitare Mahespati, mulai sekang kerajaan sing paling perek, nganti kerajaan sing palin adoh. Kabeh ditekane Rama Parasu, lan satria sing ana, sing ora ngerti kentang kimpule, ya tetep bae tinumpes dening Rama Parasu. Para satria  salumahing bumi pada miris lan wedi kabeh karo Rama Parasu, akeh sing pada umpetan, nggesruk maring alas lan ana uga sing lunga adoh banget, wedi mbok kewenangan. Mesti bae suwe-suwe satria nang lumahing bumi meh dadi entong kabeh, ditumpes kelor dening Rama Parasu.


Kanggo ngyakinaken angger nang salumahing bumi wis ora ana satria maning, Rama Parasu uga nganti ambal ping telu gole ngubengi jagad, nggoleti para satria sing dianggepe leleteking jagad, seneng perang kekeceh getih nang tegal peperangan. Bareng wis yakin angger nang salumahing bumi bener wis resik sekang  golonganing satria, Rama Parasu  banjur tindak maring lapangan Tegal Kurusetra. Nang sapinggire lapangan Tegal Kurusetra, Rama Parasu banjur gawe telaga getih sing cacahe ana lima. Kabeh  telaga mau banyune diiseni getihe para satria sing wis pada ditumpes dening Maharsi Rama Parasu.


Sawise rampung nggawe telaga getih sing jumlahe lima, Ramaparsu banjur nganakaken  upacara sesaji kanggo para leluhure sing jumlahe ana lima. Leluhure Rama Parasu sing jumlahe lima yakuwe Maharsi Bhregu, Ciawana, Urwa, Richika, lan Maharsi Jamadagni. Upacara saji Rama Parasu ketampa dening leluhure, banjur pada ngaton lan aweh pujian maring Rama Parasu. Kabeh lima leluhure Rama Parasu, banjur pada siram nang telaga getih gaweane Maharsi Rama Parasu.


Pancen sawise golongan satria tinumpes kabeh, wis ora nana maning satria. Tapi randane para satria isih akeh. Lha, apa enggane  randa para satria kuwe pada dijorna bae, padahal akeh randane satria sing ayu-ayu, ora kalah ayune karo sing isih prawan. Mulane para randa satria mau banjur rame-rame pada dipet bojo nang para brahmana.


Maharsi Rama Parasu dewek ora gelem melu-melu kawin massal senajan isih ana stok randa para satria. Sebabe Rama Parasu wis kebanjur tau sumpah, arep mbujang selawase dadi brahmacharin, yakuwe pendeta sing uripe dewekan, ora duwe bojo alias mbujang terus salawase urip. Akibat perkawinan massal antarane randane para satria karo brahmana, dadine ana satria maning nang salumahing bumi. Ning satria kiye beda karo satria sing wis ditumpes dening Ramaparau. Satria generasi baru kiye, satria sing biyunge keturunan satria, tapi bapane para brahmana utawa pendeta. Mulane satria generasi baru kiye banjur disebut satria-pinandita ya pandita-sinatria. Dijenengi satria pinandita, sebab anggere  deweke kuwe profesine dadi satria ngurusi pemerintahan lan negara, jiwane lan tindak tanduke bakal arif bijaksana, sebab nduweni wawasan lan watak pendita. Sebalike, dijenengi pandita sinatria, anggere profesine dadi pendeta utawa brahmana, tapi ya tetep duwe ilmune satria, yakuwe ngerti cara-carane ngurusi pemerintahan, keprimen supaya pemerintahane kuwe bersih, jujur, ora ana sing korup lan liya-liyane maning sing ana gandeng cenenge karo bab ngembat  urusan pemerintahan. Maring satria generasi baru kiye, Rama Parasu ora gelem numpes, dijorna kon urip ngurusi dunya, kon terwujud dunya sing tata-tentrem, kertaraharja, salam bahagia.


Nanging Rama Parasu isih sok nguji para satria sing arep dadi ratu. Satria sing pada arep dadi ratu sok ditekani banjur ditantang kon mentang gendewa pusakane Bargawastra. Angger ora bisa, ya langsung ditantang perang, banjur dipateni. Sebab menurut panemune Ramaparusu, ratu sing ora bisa menthang gendewane, berarti ratu kuwe ora pantes dadi ratu. Angger meksa dadi ratu, mesti bakal dadi leleteking bumi. Mulane luwih apik anggere dipateni bae. Ning sedurunge dipateni isih diwehi kesempatan kon ngalahna Rama Parasu  lewat peperangan. Sing akeh-akeh ya pada mati, ora ana ing bisa ngalahna Rama Parasu.


Pancen saya suwe Rama Parasu banjur mandan duwe sifat sombong, ngrasa paling sekti sealam dunya. Nganti sawijining wektu ngrungu ana satria putrane Prabu Dasarata, Ratu Kerajaan Ayyodia sing nembe bae daup karo Dewi Sinta, putrine Prabu Janaka, Ratu  Kerajaan Mantili. Satria mau jenenge Raden Ramawijaia Dasarata Putra.


Sawijining wektu Rama Parasu kepengin njajal keperwiraane lan kedigdajaane Raden Rama, apa bener bisa nandingi  krodane Rama Parasu sing wis  ngalahna sakabehing satria. Ramaparsu nyandak pusaka Bargawastra, banjur mangkat garep ngadang romobongane Raden Rama  Wijaia sing arep bali maring Ayyodia kambi mboyong Dewi Sinta. Akhire Rama Parasu klakon ngadang lakune  rombongan Raden Rama. Ramaparsu, kambi nyekel gendewa pusaka Bagawastra, ngadeg nang tengah dalan, ngendeg lakune rombongan. Bareng wis weruh Raden Rama Wijaya, banjur sesumbar nantang Raden Rama.


“Heh, Dasarata Putra! Menawa sira pancen satria wiratama sing sekti mandraguna, jajal tampani gendewa karo  jemparinge. Ya kiye salah sijine pusakaku, sing wis tek enggo mateni pirang-pirang ratu sejagad. Angger sira ora bisa menthang gendewa pusakaningsun, sira mesti bakal ajur dening ingsun Rama Parasu, ya Ramabaghawa, Jamadagni Putra.” Raden Rama trengginas nampani  gendewa dalah jemparing pusakane Rama Parasu. Jemparinge Rama Parasu sing ampuhe kagila-gila uga wis dipasang, gendewa banjur pinentang, gumerot swarane  banget nggegirisi.


Sawise gendewa bisa dipentang, Raden Rama Wijaya mandeng Rama Parasu kambi ngendika kaya kiye, ”He brahmana sing murang tata! Aja dumeh wis bisa numpes satria sejagad, kowe banjur nang ngendi bae pamer kadigdajan, kebacut-bacut anggone kumalungkung  adol gendhung, sesumbar macia-cia. Heh, brahmana. Jajal delengen kanti premana, ana apa nang sariraningsun!”


Maharsi Rama Parasu, banjur ndeleng maring sarirane Raden Ramawijaia. Kaget pada sanalika, merga Rama Parasu banjur weruh sawernaning wujud werna-werna, antarane yakuwe, para aditia, para dewa, para gandarwa, jaksa, resi, senjata sing werna-werna, samudra, narmada, lan liya-liyane maning. Kabeh pada ngumpul nang awake Raden Rama Wijaya. Sang Rama Wijaia banjur nglepasna jemparing, ditibakna maring Rama Parasu. Saknalika Rama Parasu  ketrajang jemparing, banjur tiba maring bantala, kantaka ilang purwa duksina.

Nanging ora let suwe banjur eling maning, Rama Parasu  tangi lan njagong ngadep Sang Ramawijaya kanti getering penggalih. Sajroning kantaka, Rama Parasu krasa karawuhan para leluhure kang ngendika kaya kiye, ”He, kulup, Rama Parasu. Sang Rama Wijaya kuwe titisaning Bethara Wisnu. Mulane keliru banget anggere kulup kumawani maring Sang Rama Wijaya.” Mulane  Rama Parasu bareng wis eling banjur njaluk ngapura maring Sang Ramawijaia, karo njaluk ditidokna  dalan, apa sing kudune  dilakoni  supayane deweke bisa slamet urip nang dunya kiye. 

Raden Rama Wijaya banjur ngenidika, ”He, Rama Parasu, angger kowe pancen arep mertobat, dedununga ing wukir Mahendra, madega dadi brahmana guru bangsa, ajarana para satria supaja dadi satria pinandita lan ajarana para pandita supaya dadi pandita sinatria. Satria pinandita iku ya satria tama, satria sejati, satria sing bisa mamayu hayuning sarira lan keluarga, mamayu hayuning bangsa lan negara, sarta mamayu hayuning manungsa. Dene sing diarani Pandita Sinatria iku  pandita sing bisa mamayu hayuning bawana, manunggaling gusti lan kawula, suci tata ngeti tunggal”.


“He, Rama Parasu, wruhanira mbesuk ing tanah Jawa, bakal ana negara  sing dasare Pancasila, sing mung bisa  dilakoni dening wong-wong sing duwe  watak satria pinandito karo pandita sinatria. Mangertia, he, Rama Parasu. Wataking satrio pinandito–pandito sinatria karo Pancasila kuwe, sakjane surasane pada bae, piinda sirih lumah lan kurebe,yen sinawang seje rupane, nanging yen ginigit pada rasane. Sebab saka iku, he, Rama Parasu. Ajarana mbesuk para siswa-siswa, cantrik-mentrik, lan muridmu, supaya bisa ngerti, ngrasa   ,lan nglakoni ngelmu luhur, sebab ngelmu iki kelakone kanti laku.”


“Aduh, Inggih Raden, nanging sedaya kadigdayan kula sampun ical, otot bayu kula kados dipun lolosi. Sumangga kula aturi nyirnakaken kula kemawon, Raden,” kaya kuwe sambate Rama Parasu sing wis ilang kadigdayane lan kasektene, sebab ketaman senjata pusakane dewek.


“He, Rama Parasu, sira tahu njaluk umur sing dawa marang dewa. Dewa durung marengake sira bali maring kasidan jati. Mulane kowe sak durunge mangkat menyang wukir Mahendra, mangkata menyang narmada Wadusara, sirama ing kana. Wruhanira, he, Rama Parasu. Ing sakcedake tuke narmada Wadusara, ana papan suci kang diarani Dhipthoda.Ya papan iku tilas pertapane leluhurira Maharsi Bhregu. Jalaran kaprabhawan saka keramate Dhipthoda, mulane sing sapa adus ing narmada Wadusara, bakal sirna ilang uwas-sumelanging atine, ilang rasa garis mirise, pulih kasudiran lan kasektene. Ya, ing Dhiptodha iku leluhurira Maharsi Bhregu duk ing uni  tarak brata mati raga pirang-pirang warsa, nganti antuk nugrahaning Jawata”


Krungu pangandikane Raden Rama sing kaya kuwe, Rama Parasu banjur pamit, saperlu arep adus maring narmada Wadusara. Bareng rampung adus, temenan Rama Parasu bisa pulih maning kedigdayan lan kesektennane Rama Parasu. Rama Parasu, ya Maharsi Jamdagni Yunior, banjur yasa paguron ing wukir Mahendra. Akeh para siwane sing pada meguru maring Maharsi Rama Parasu Jamadagni Putra. Salah sijine murid kinasihe, yakuwi Raden Dewabrata, putrane Ratu Ngastina, Prabu Sentanu. Raden Dewabrata uga banjur madeg resi jejuluk Resi Bisma. Tanjeb kayon.(Tamat, 29-06-2016).




 




Wayang Kulit Banyumasan : Sumpahe Rama Parasu (03)





 Sumber gambar : wayang.wordpress.com
Bareng Prabu Arjuna Sasrabahu wis ninggalna Padepokan, prajurit Mahespati banjur cepet-cepet  nindakna dawuhe Sang Prabu. Sang Maharsi ujug-ujug bae ditangkep dening prajurit telu cacahe, banjur dijagongna nang dingklik, dijaga prajurit telu, sing siji nang sisih tengen nyekeli lengen sing tengen, sing siji maning nang sisih kiwe,nyekeli lengen kiwe, sing siji liyane maning nang buri, njekeli pundake. Perlune kon Maharsi aja bisa lunga-lunga. Sapi Nandini sing nang kandang, wis kelakon digered sekang kandange lan digawa metu,diringi sepuluh prayurit.Nanging prajurit sing cacahe lima sing ditugasi nggawa Dewi Renuka,gagal nemokna, padahal tandu nggo mbojong maring Mahespati wis siap nang latar padepokan.

 ”Lah, kiye mau maring ngendi bojone Maharsi sing wis dikersakna Sang Prabu? Koh ora ana nang dapur?.He kanca2 ,jajal digoleti nang senthong.Leboni unggal senthong.Aja kelalen goleti mbok umpetan nang sanggar pamujan”,kaya kuwe omongane komandan peleton(danton),sing olih printah kon nggawa Dewi Renuka. Nanging senajan sentong wis diorak-arik,sanggar diobrak-abrik,sing di goleti ora ana.Mulane banjur pada  laporan maring komandan peleton prajurit Mahespati sing wis nampa dawuh Sang Prabu Mahepati kon mboyong peksa Dewi Renuka. Bareng wis krungu laporan angger sing digoleti ora nana,komandan peleton banjur mereki Sang Maharsi sing lagi disandera.


“He, Maharsi.Bojomu dikersakna nang Gustiku. Aku didawuhi kon mboyong maring Mahespati.Lha kae tandu  sing nggo gawa  ya wis siap. Lha siki diumpetna nang endi? Jawab Maharsi!!!”, komandan regu takon maring Maharsi. Mesti bae Maharsi ora njawab, sebab nang batin mbededeg banget deneng koh ana prajurit sing  wani kurang ajar lan murang tata maring deweke. Tapi arep budi ya ora bisa,sebab sing maune mung dicekeli prajurit telu bae ora bisa obah.Apa maning siki ditambah komandan peleton sing kaya arep nginterogasi,ngadeg nang ngarepe,gole ngomong kambi  nggentak2 ngedirna kekuasaane.


“He Maharsi! Jawab  takonane Iyong sepisan maning.Diumpetna nang endi bojomu?”,komandan takon maning karo nggentak luwih seru maring Sang Maharsi Jamadgni.”Nek ora gelem njawab mesti bakal tek pilara kowe!!!”,komandan regu mulai ora sabar,ngomong kaya kuwe kambi matane dipendelik-pendelikna,raine diperek-perekna maring raine Maharsi Jamadagni.Malah siki tangan kiwene wis wani  nyekel jenggote Sang Maharsi. Nanging Senajan digentak-gentak lan dipeksa-peksa,Sang Maharsi tetep meneng bae.Niate arep ngeningna cipta,maca rapal lan japa mantra,arep ngetokna kedigdayanne nggo nglawan para prajurit.Nanging,Sang Maharsi  ora emut yen deweke wis pirang2 dina ora munggah maring sanggar pamujan,wis pirang2 dina ora maca rapal japa mantra,wis pirang-pirang dina ora tahu dzikir lan samadhi.Mulane dadi kelalen rapal japa mantra  nggo ngetokna kedigdayane. Pirang bara apal rapal japa mantra kedidayan,sing apal kecepal mung gari japa mantra Aji Kamasutra.Pancen bisa dimaklumi,Sang Maharsi Jamadagni sing maune Maharsi sing gentur samadhine lan mandi sabdane, wis ora tau  gentur samadhi lan dzikir nang sanggar pamujane,tapi ndina2 akhir2 kiye gentur nang sentong bae,kelon terus karo bojone.Mesti bae banjur ilang mandine lan kedigdayaane.Ibarat macan wis ilang siunge,gajah tugel gadinge,manuk garuda ilang cekere,ula ilang upase. Lir godong jati aking, sepi sepa asepah samun.Ning kayane pancen wis tiba titi mangsane, Sang Maharsi kudu ngunduh wohing pakarti.Mergane tahu ngukum anake lanang papat dadi kentir,siki Sang Maharsi uga dijaga prajurit papat,sing wis siap2 garep milara Sang Maharsi.


Komanda  peleton wis sangsaya ora sabar maning, mulane banjur aweh ancaman terakhir,”He Maharsi,koh meneng bae kaya Maharsi kentir, jawab takonku sepisan maning. Nang endi bojomu, umpetan nang padepokan apa nggesruk maring alas?”. Sang Maharsi tetep bae kukuh  ora gelem njawab,malah cangkeme umed-umed maca rapal japa mantra kadigdayan, naning  ndilaha keliru, sing diwaca  malah japa mantra Aji Kamasutra. Mulane Sang Maharsi banjur ndredeg wel-welan, angger ora dicekeli mesti wis tiba gentawilan.Socane merem,nanging sekang cangkeme metu swara sesambat,”Duh…Nini Dewi, Nini Dewi…..Nini Dewi,”kaya kuwe sambate terus-terusan  kayong wong lagi brangta  dadi gumune prajurit papat sing wis siap garep milara.


Mulane komandan prajurit banjur ngomong,”Wah,genah diumpetna kiye bojone,buktine siki diundang-undang. Ayuh dipilara bae,mangsa tegaa bojone sing lagi umpetan apa nggesruk nang sekitar kene. Mengko mesti bakal teka ngeneh”.Bar ngomong kaya kuwe, komandan prajurit langsung   bug!. Bogem mentah  pembukaan ditibakna maring raine Sang Maharsi. Sabanjure Sang Maharsi diantemi prajurit papat.Ana sing ngantem sekang kiwe,sekang tengen,sekang buri lan sekang ngarep,dipilara didadekna bancakan. Mesti bae Sang Maharsi banjur mumet sirahe,kunang2 pandelengane,matane mulai bengep lan biru-biru,lambene pecah,sekang irunge mulai metu getihe,dipilara kaya kuwe suwe-suwe Sang Maharsi gentawilan,tiba sekang dingklik,tiba maring lemah.Nanging para prajurit Mahespati sing lagi milara Sang Maharsi ora leren, malah ana sing nendang karo  arep ngidek-idek Sang Maharsi sing wis tiba  mengkureb  . Untunge  komandan regu nglarang,karo ngomong.


 “Aja kebanjur, mengko mbok mati.Tugase sekang Sang Prabu ora mateni Sang Maharsi.Ning mung kon mboyong bojone.Jorna bae kon nggereng-nggereng ngundang-undang bojone.Sedela maning tuli bojone teka. Ditunggu bae.” Pancen Sang Maharsi Jamadagni sing wis tiba tengkureb nang lemah isih terus nggereng-gereng kambi ngundang-undang bojone, sebab kenang dayane aji kamasutra.Nanging suara gerengane suwe-suwe mung krungu lamat-lamat, banjur ilang.Sang Maharsi meneng bae, kaya wong turu, semaput merga dipilara lan diantemi prajurit papat. Nanging lambene keton mesem, ndean tah turu kebanjur kambi ngimpi ngeloni  ingkang garwa, kena dayane aji kamasutra sing wis dirapal. Mulane senajan nembe dipilara, kayonge ya ora ngrasa  lara. Embuh mengko anggere wis emut sekang semapute.


Kocap kacarita, Ramaparasu sawise  disusul ibune lan krungu wadulane ingkang ibu sing kamiweden banget, banjur nyandak kampak pusakan, mlumpat pada sanalika  ninggalna kakange karo ibune, cepet-cepet mlayu sipat kuping bali maring padepokane. Ibune karo kakang-kakange ya banjur pada nusul Ramaparasu bali maring padepokane sing lagi kenang musibah. 

Tekan latar padepokan, Maharsi Jamadagni  banjur mandeg sedela, tangan sijine malang kerik, sing sijine maning nyekel kampak pusaka sing landape kaya pisau cukur, tur dawane lan gedene ora karuan. Matane jlalatan nggoleti Sapi Nandini ing biasane nang kandang. Bareng bener weruh kandang sapi Nandini  pusaka  padepokan wis ora nana nang kandang, Maharsi Ramaparasu sing sarirane gede duwur, gagah pideksa, banjur jengkel banget. Raine jajabang mawinga-winga, netra andik angatirah imba tepung, idep mangada-ada, untu gathik kumedud padoning lambe, banjur bengok-bengok  suarane kaya bledeg nyamber-nyamber padepokan, nantang-nantang maring puluhan prajurit Mahespati sing lagi pada ngepung padepokan, sebab isih nggoleti Dewi Renuka, ibune sing dikersakna Prabu Arjuna Sasrabahu.


“Heh, prajurit Mahespati, kiye Ramaparasu putrane Maharsi Jamadagi, adepi disit krodaku angger garep mbradat Sapi Nandini, Sapi pusaka keluarga  Padepokan Sambiharja. Angger ora, klakon tigas gulumu mangsa ora potola. Ayuh  maju kabeh yen pancen  kowe prajurit sejati. Aja wanine mung jag-jagan ngrusak kesucian padepokane Maharsi Jamadagni!” kaya kuwe sesumbare Ramaparasu. 

Krungu sesumbar kaya kuwe, komandan peleton prajurit Mahespati banjur aweh komnando kon ngepung lan ngrangket Maharsi Ramaparsu. Puluhan prajurit Mahespati, sing nggawa tombak maju bareng mak grek ngepung garep ngrangket Maharsi Ramaparasu.Tumbak wis mulai pating tlalang dibalangne maring sarirane Maharsi Ramaparasu. Tapi Mahari Ramaparasu, dudu maharsi baen-baen. Deweke pinter olah yuda, bisa nggunakna sakehing gegaman perang. Senjata klangenane yakuwe kampak gede lan gendewa pusaka jenenge Bargawastra sing langkape dawa lan gede banget.Siki Ramaparasu nggunakna kampak pusakane  nggo nglumpuhna mungsuhe.

Bareng weruh tumbak pating tlalang arep nibani deweke, Ramaparasu trengginas muter kampak pusakane lelet banget kaya kitiran, kanggo nadahi tumbaktumbak sing marani deweke. Kena tangkisane kampak, tumbak-tumbak banjur, prang! Pada tugel dadi sewalang-walang. Ramaparasu mlumpat mereki prajurit sing ngepung kambi nyabetna kampake. Sesabetan, sepuluh sirah prajurit Mahespati pada gumlundung tiba maring lemah potol sekang gulune, disusul getih  abang sing pating puncrat lan gembung sing pada tiba pating gedebugan. Nembe sesabetan bae wis sepuluh prajurit sing potol sirahe. Lha wis pira angger limang sabetan. Mulane senajan dikroyok  se-peleton prajurit Mahespati, ora bakal bisa nandingi krudane Ramaparasu. 

Prajurit sing isih urip dadi miris, mulane banjur pada mlayu, bubar kabeh ninggalna padepokan, malah komandan peletone wis ngitar disit,wedi mbok potol gulune. Bareng prajurit Mahespati sing isih urip pada mlayu kamiweden, Ramaparasu cepet-cepet mlebu ngumah. Nanging  Ibune karo kakang-kakange wis pada tekan malah wis pada nang njero ngumah lagi nulungi ramane. Maharsi Jamadagni lagi dadi  rubungan, diturokna nang amben, wis emut, ora semaput maning, mung kari ngrasakna  larane. Bareng weruh ramane isih urip, Ramaparasu bungah banget deneng koh bapane slamet. Tapi deweke banjur kemutan sapi pusaka ingoningone,sapi Nandini sing wis diglandang maring Mahespati. Ramaparasu terus bae njikot pusaka panah Bagawastra, lengkap kambi gendewane sing  dawa, gede, lan abot banget tumrap wong biasa, nanging enteng kanggone Ramaparasu.Tekade arep ngoyak Prabu Arjuna Sasrabahu  sing wis murang tata. Ingatase ratu  koh  gelem  ngrampok sapi, malah arep mboyong ibune.


Wektu semana Prabu Arjuna Sasrabahu  lagi nitih kereta garep bali maring Mahespati. Sang Prabu lagi enak-enak njagong nang kreta, arep bali maring Kratone Mahespati, kepengin bangaet enggal-enggal tekan, perlune arep nyiapna kamar nggo  Dewi Renuka angger mengko klakon keboyong maring Mahespati. Nang batin Sang Prabu  ngudarasa dewek, ”Ee wong Wadon ayu kaya kae,sing kaya jambe sinigar karo Yaji Dewi Citrawati, masa ora gelema dadi bojone Ratu Mahespati,ratu sing gung binatara sugih bandu banda.Eman-eman banget  wong wadon ayu kaya kae koh mung trima urip nang padepokan,dadi bojone  Maharsi.Dadi bojoku mesti bakal luwih mukti lan mulya.Apa panjaluke mesti bakal tek turuti.” Kaya kuwe panglamune Prabu Arjunasarabahu, sing mulai kasmaran lan nandang brangta maring Dewi Renuka. Mulane Prabu Arjunasasrabau ora ngira babar pisan angger lagi dioyok Ramaparasu sing playune cepet banget. Sedela bae, playune Ramaparasu wis  meh bisa nututi  kereta  sing  dititihi Prabu Arjuna Sasrabahu. 

Bareng kira-kira wis  perek, Ramaparasu mandeg sedela, banjur mentang  gendewa pusaka  nglepasna  panah  maring kretane Prabu Arjuna Sasrabahu sing lagi ngambah dalan mlayu banter banget. Panah pusaka sing ampuhe kepati-pati, lepas sekang tali gendewa, ndadekna udan panah sing pating clorot kaya tatit nyamber-nyamber karo ngoyok keretane Prabu Arjuna Sasrabahu. Wektu kuwe  Prabu Arjuna Sasrabahu    ora ngira babar pisan yen usahane prajurite mboyong bojone Maharsi Jamadagi ora hasil. Mulane sedalan-dalan  terus mbyangna  mendah senenge bakal duwe bojo maning sing ayune njambe sinigar karo Dewi Citrawati. Babar pisan ora ngira yen  bakal nemu bilahi sing dadi marganing pati. 

Udan panah pusaka klakon  nrobos kretane Sang Prabu Arjuna Sasrabahu, bahune sing jumlahe bisa dadi  sewu angger tiwikrama. Ketiban panah pusaka Maharsi Ramaparasu, lengene Sang Prabu Arjuna Sasrabahu pedot tatas rantas pada sakna lika, tiba nang bantala, ndadekna sedane Prabu Arjuna Sasrabahu ing wektu iku uga. Kusir kreta kaget banget bareng ngerti yen gustine sing njagong nang mburine wis seda prutul tangane ketrajang panah pusakane Ramaparasu. Mulane kreta banjur cepet-cepet diplayokna maring Mahespati nggawa ratune sing wis dadi layon.[ana candake]
Artikel candake : Sumpahe Rama Parasu bagian 04- Tamat.

Senin, 27 Juni 2016

Wayang Kulit Banyumasan : Sumpahe Rama Parasu (02)




Sumber Gambar : wayang.wordpress.com
Suluk disit :

Aja turu......sore-sore .....cah bagus lan cah ayu.........ana....dewa....nganglang jagat....nyangking bokor kencana  isi ne donga  tinular....sandang klawan pangan.....ya iku bagian nipun......wong sing melek lan sabar ...nrima...hoooo.....heeee….


Ingkang garwa Dewi Renuka, ya sebenere wis tau ngelingna maring Sang Maharsi, "Duh Maharsi samenika sampun wanci siang, kula dereng damel unjukan kalian masak. Bade dateng tegalan rumiyin saperlu mendet lombok, kacang panjang, ron lembajung, kecipir, welok, terong, lan sanes-sanesipun. Bade damel sayur lodeh, kluban, lan sambel. Punapa Kanjeng Maharsi boten kangen kalian sambel lan masakan kulo?"

Dewi Renuka pancen pinter masak, sambel gaweane ya enak. Diarani pedes ning ora patia pedes, diarani ora patia pedes, tapi ya pedes. Kayane angger gelem mbukak usaha kuliner warung sega nang Banyumas, Prakerta, Sokaraja, apa Sidareja lan Cilacap, kajonge tah laris pisan.Apa maning nang Bandung utawa Jakarta.


Krungu ature ingkang garwa, Maharsi Jamadagni ngendika, "Mesti bae aku kangen maring masakanmu, Nini Dewi.Kluban,sayur lodeh karo sambele pisan. Nanging aku lagi luwih kangen dibatiri nang kene. Siki kaya kije bae.Ora usah maring tegalan, ora usah masak, ora usah gawe unjukan. Ning angger garep adus ya nganah, aja kesuwen. Sawise adus maring kandang sapi  Nandini bae. Diperes jikot banyu susune, terus nyuwun sakehing masakan maring Sapi Nandini. Aja kelalen dongane.Isih emut, mbok?"


Ingkang garwa mangsuli, "Teksih sanget, nanging punapa Kanjeng Maharsi boten bade tindak dateng langgar sanggar pamujan?"


Sang Maharsi njawab enteng, "Bab kuwe gampang, bisa tek ropel mengko angger aku wis mari kangenku maring kowe, Nini Dewi. Dina kiye paling ya aku mung arep adus thok. Nanging bar kuwe, ya kudu dibatiri maning nang senthong, ya. Wis nganah angger garep adus, aja kesuwen lan aja kelalen maring kandang sapi."


Dewi Renuka njawab,"Inggih, Sang Maharsi."


Nanging bareng ingkang garwa Dewi Renuka garep tangi, tangane isih dicekeli bae, malah bangkekane dicandak, banjur ditarik lan dikeloni maning, kambi dirisiki, "Sepisan maning, ya, Nini Dewi."


Dewi Renuka ya manut bae, banjur terus mapan mlumah garep gawe legane Sang Maharsi, karo mangsuli, "Inggih sumangga kersa, Kanjeng Maharsi".


Kaya kuwe kegiatane Sang Maharsi Jamadagni, ndina-ndina embuh pirang seri sedina sewengi. Putra-putrane weruh polahe ramane, ya mung pada meneng bae. Malah esuk-esuk banget bocah lanang lima mesti wis cepet-cepet lunga ngalas, sengkud gawe proyek mbukak kebon lan sawah anyar. Perlune angger  awan-awan,  ya ora pati ngganggu rama karo biyunge sing lagi sibuk honei moon jilid pindo. Mesti bae kahanan Padepokan angger awan dadi sepi. Sebab putra-putrane pada maring alas nggarap proyek nganti sore. Sang Maharsi karo Garwane angger awan, ya pada nang sentong bae. Paling-paling, ana cantrike sing pada piket nggo jaga-jaga mbok menawa ana tamu.


Nanging temenan sawijining dina, padepokan kerawuhan tamu agung sekang Kerajaan Mahespati. Prabu Arjuna Sasrabahu, Ratu Mahespati, diiringi pengawale sawadya balane rawuh maring padephokan, saperlu garep mundut Sapi Nandini, sapi pusaka ingon-ingone Maharsi Jamadagni. Angger olih arep ditembung apik-apaik arep dijaluk. Angger ora olih ya arep dipeksa lan diglandang bae. Pancen, ana landa dolanan dara, sing sapa lena, bilahi ya njur bakal teka.

***

Sapa sih jane Prabu Arjuna Sasrabahu kuwe? Prabu Arjuna Sasrabahu kuwe putune Prabu Herria, Ratu Mahespati sing wiwitan lan putrane Prabu Kartawiria, ratu sing kepindo. Dadi Prabu Arjuna Sasrabahu, ratu sing nomer telu. Sawise Prabu Arjuna Sasrabahu seda tanpa perang tanding karo Maharsi Ramaparasu, putra-putrane kabeh tinumpes kelor dening Maharsi Ramaparasu putra ragile Maharsi Jamadagni, ya wiwit saka wektu kuwe Kerajaan Mahespati ilang sekang lumahing bumi.


Jan-jane Prabu Arjuna Sasrabahu tahu ketitisan Betara Wisnu, mulane tahu kondang dadi ratu sing gung binatara, padang obore, duwur kukuse, adoh kuncarane. Mergane pancen tahu duwe curiga, turangga lan kukila. Curiga kuwe keris, lambange kasekten, cipta, rasa, lan karsa., sing ndadekna bisa triwikrama, sebab pancen titisane Betara Wisnu. Duwe turangga, lambange kekuasaan, sebab duwe patih sing sekti lan pengabdi setia, Patih Sumantri Suwanda Geni. Uga duwe kukila, yakuwe bojo sing aju kinyis-kinyis, Dewi Citrawati, putri sekang kraton Magada.


Prabu Arjuna Sasrabahu, dijuluki sasra bahu, sebabe angger tiwikrama, malik dadi buta sing gede banget sing tangane utawa bahune dadi sewu cacahe. Sasra, sekang tembung sasraha, sing artine sewu. Nanging, suwe-suwe Batara Wisnu lunga, ora betah, sebab Sang Prabu Arjuna Sasrabahu, bareng mbojo Dewi Citrawati, ketungkul ngurusi bojone bae, ora gelem ngurusi kawula lan negarane. Urusan praja lan kawula diserahna maring putra-putrane, ngonoh terserah arep diapakna Kraton Mahespati.


Dewi Citrawati pancen bojo sing aju banget, uga tahu dadi titisane Dewi Sri. Sayange Dewi Citrawati kiye aleman banget, penjaluke werna-werna, tur sing angel-angel. Cara jaman sakiye ndean ya istri matrek. Adoh banget wateke karo Dewi Renuka, sing jan-jane ya ora kalah ayune karo Dewi Citrawati. Nalika Dewi Citrawati dilamar Prabu Arjuna Sasrabahu panjaluke madan ora memper pisan, yakuwe njaluk diiringi prawan dhomas sing jumlahe 800. Jaman semana nggoleti prawan ayu nganti 800 mesti bae ora gampang, kudu ndimek maring ngendi. Untunge, akeh kraton sing pada gelem mbantu. Nek jaman siki sih gampang. Pasang iklan nang koran, tv apa internet, mesti bakal mbrudul, akeh sing ndaftar.


Bareng wis klakon daup, wengine nganti pirang-pirang bengi Dewi Citrawati isih durung gelem disenggol dening Sang Prabu. Sebab isih duwe panjalukan maning sing luwih angel, yakuwe karepe malam pertama sare bareng karo Sang Prabu, kudu nang sajroning taman kaswargan, sing jenenge Taman Sriwedari. Untunge Sang Prabu duwe patih Sumantri sing bisa mindah Taman Sriwedari sekang Kahyangan Utarasagara maring Mahespati, sebab dibantu adine buto bajang Sukrasana. Ya, nang pesanggrahan Taman Sriwedari sing wis dipindah maring Mahespati kuwe, Prabu Arjunasasrabahu nembe bisa klakon lambangsari malam pertama karo Dewi Citrawati.


Ana penjalukane maning sing dadi margane Dewi Citrawati nemu dalaning pati. Dewi Citrawati njaluk dibendungna bengawan, perlune arep kanggo adus nang muaraning bengawan. Nanging Dewi Citrawati ora kersa adus lan lelumban dikancani Sang Prabu. Deweke mung arep adus karo abdi pengiringe thok. Tugase Sang Prabu kur kon mbendung bengawan, perlune banyune dadi madan gampang nggo adus karo lelumban. Sang Prabu banjur tiwikrama, turon mbendung bengawan nganggo sarirane. Patih Sumantri di kon cuti ora usah ngurusi negara disit, perlune kon njaga Sang Prabu sing lagi tiwikrama mbendung bengawan lan uga njaga Dewi Citrawati sing arep adus karo lelumban diiringi para abdine wadon kabeh.


Kacarita, Patihe Dasamuka Kala Marica, sing wis suwe nginggeng  Dewi Citrawati sing lagi adus, banjur teka garep ngruda peksa. Ndilalahe, Patih Sumantri gole piket ngjaga bojone gustine, mandan adoh, ora wani perek-perek. Kala Marica bungah banget bisa mereki Dewi Citrawati, lan arep dirudapeksa alias diperkosa. Dewi Citrawi kaget banget. Arep njaluk tulung karo sapa? Nang batin Dewi Citrawati getun banget, sebab deweke sing prentah Patih Sumantri kon aja perek-perek, mbok bojone, Prabu Arjuna Sasrabahu cemburu. Dewi Citrawati bisane mung njerit sekuate. Tapi Kala Marica ora kelangan akal. Bangkekane Dewi Citawti bisa disaut, lan digawa mentas maring pinggir bengawan. Nanging sadurunge bisa ngruda peksa lan nguculi klambine Dewi Citrawati, tangane Sang Dewi nyandak patrem sing disimpen nang sanggule. Dewi Citrawti lumuh wirang sebab wis klakon kejamah wong lanang sing dudu bojone tur buto maning. Dewi Citrawati milih suduk sarira, dadi lan patine.

Patih Sumantri Suwanda Geni kaget banget bareng ngerti ana buta mata kerancang wani-wani ngganggu bojone gustine. Perang tanding Kala Marica karo Patih Sumantri Suwanda Geni, ora bisa dicegah. Sayang Patih Sumantri gagal mateni Kala Marica. Sebab Kala Marica bisa mlayu lan njaluk tulung karo bendarane Prabu Dasamuka sing nuju masanggarahan nang pinggir alas, ora pati adoh karo muara kali sing lagi dibendung Prabu Arjuna Sasrabahu. Sial kanggone Patih Sumantri Suwandageni, sebab deweke utang dosa lan nyawa, yakuwe tahu mateni adine dewek, Buta Bajang Sukrosono. Akhire Patih Sumantri Suwandageni  seda kalah pancakara karo Prabu Dasamuka.


Mesti bae, Prabu Arjuna Sasrabahu, duka banget. Prabu Dasamuka banjur diamuk dening Prabu Arjuna Sasrabahu. Dasamuka kalah ing juda, banjur dirangket, lan arep dipateni. Nanging dewa ora marengake Prabu Arjuna Sasrabahu sing wis koncatan Wisnu mateni Dasamuka. Dasamuka banjur diapura, diculna, terus bae ngitar bali maring Alengka, ninggalna Prabu Arjuna Sasrabahu sing mung bisane deleg-deleg. Enggane koh mung sedina bisa kelangen patih kinasih lan bojone sing terus-terusan gawe kasmaran lan gandrunge Sang Prabu. Ya, saka wektu kuwe Sang Prabu banjur keton nglokro, keton-ketonan terus maring Dewi Citrawati. Pendak dina metu kraton njajah desa milang kori,mbok-mbok nemu wong wadon sing pada ajune karo Dewi Citrawati. Akhire lakune Prabu Arjuna Sasrabahu tekan padepokane Maharsi Jamadagni, sing kawentar duwe bojo ayu awet enom, yakuwe Dewi Renuka.

***

Prabu Arjuna Sasrabahu rawuh maring padepokane Maharsi Jamadagni, sebab krungu kabar angger Sang Maharsi kuwe duwe sapi wadon sapi Nandini. Sapi Nandini kiye duwe khasiat werna loro. Sepisan, bisa aweh sawernaning dedaharan lan peni raja peni sing dikarepna dening Sang Maharsi. Kaping loro, sing sapa bae nginum banyu susu peresane susune sapi Nandini bisa bakal awet nom terus, ora bisa tuwa, lan umure bisa nganti sewu warsa. Maharsi Jamadagni karo putra-putrane, lan garwane, merga sering ngunjuk banyu susu Sapi Nandini, mulane banjur olih khasiate susu sapi Nandini. Sarirane pada seger-seger,keton enom bae. Apa maning Dewi Renuka. Ora ana sing ngira yen deweke kuwi wong wadon sing wis duwe putra lima sing wis ngancik remaja. Akeh sing ngira yen Dewi Renuka kuwe pantese dadi putrine Sang Maharsi. Kabeh kuwe mau merga sekang dayane banyu susune sapi Nandini.


Kacarita, Rawuhe Sang Prabu ditampa karo ati bungah banget dening Maharsi Jamadagni. Saking bungahe kerawuhan Ratu, Maharsi  Jamadagni kongkon bojone dandan sing apik lan njiapna pasugatan dedaharan werna-werna, wowohan, lan unjukan banju susu perah Sapi Nandini. Dedaharan sing disuguhna maring Sang Prabu, yakuwe dedaharan sekang khasiat lan daya kasektene Sapi Nandini.


Bareng kabeh dedaharan lan unjukan wis siap, Dewi Renuka ngaturi Sang Prabu lan pendereke  kersaa nyicipi dedaharan lan unjukan sing wis temata. Bareng Sang Prabu weruh Dewi Renuka sing mung sak klebatan, saknalika Sang Prabu kemutan marang ingkang garwa Dewi Citrawati sing wis bali maring kasidan jati. Sakjrone dahar dibatirii Sang Maharsi, Sang Prabu mbatin,”We lha, aju temen bocah wadon kae, kaya jambe sinegar karo Yayi Dewi Citrawati.”

Sawise rampung gole dahar, Sang Prabu banjur ngendika, ”Dedaharan iki lan unjukan banyu  susu mirasa banget, apa bener sabab saka dayani sapi Nandini  ingon-ingonmu mu, Maharsi?”


Sang Maharsi  mangsuli, ”Inggih leres, Kanjeng Prabu.”


Sang Prabu ngendika maning,”We lha, ana Maharsi duwe unjukan sing rasane ngluwihi rasane unjukane Ratu Mahespati!”


Krungu  pangandikane Sang Prabu, Sang  Maharsi meneng bae, nanging atine wiwit ngrasakna ora madan kepenak. Apa maning bareng Sang Prabu uga takon bojone,”Lha, sapa kae bocah wadon sing mau ngaturi dahar, Maharsi? Anakmu apa anake kancamu?”


“Tiyang estri kala wau punika, sanes anak kula, Kanjeng Prabu. Punika wau inggih bojo kula, biyungipun anak kula gangsal ingkang sampun ngancik dewasa. Sakniki anak-anak kula nuju wonten wana, mbikak tegalan enggal, pramila  boten saged  ngurmati rawuhipun Kanjeng Prabu ing Padepokan ngriki.”


“We lha, tiwas kebeneran banget. Dadi wong wadon mau bojomu,Maharsi?”


”Inggih Kanjeng Prabu.”


Sang Prabu Arjuna Sasrabahu banjur ngendika maning, ”Dadi ana Maharsi, duwe bojo ayu, ayune  ngluwihi  garwane Ratu Mahespati.”


Dewi Renuka sing lagi nang umah njero, krungu kabeh pangandikane Sang Prabu Arjuna Sasrabahu,  tanggap anggere bakal ana bilahi. Mulane enggal metu lewat mburi mlayu maring ngalas, karepe arep nusul ingkang putra kon enggal-enggal bae bali maring padepokan. Sang Prabu sing isih ngendikan karo Sang Maharsi, ora ngerti anggere Dewi Renuka wis mlayu sekang Padepokan. Ngertine ya isih nang pedangan.


Sang Prabu ngendika maning maring Sang Maharsi, pangandikane siki malah wiwit murang tata.

”He, Maharsi Jamadagni! Bojomu sing aju kae arep tak bojong maring Mahespati, semono uga sapi Nandini kewan ingon-ingonmu arep tak pundut lan tak gawa menyang Mahespati, oleh apa ora?”


Durung nganti Maharsi Jamadagni njawab, Sang Prabu Arjuna Sasrabahu sing wis koncatan wisnu lan murang tata kuwe, banjur ngendika maning, ”Olih ora olih, ya kudu oleh! He, komandan prajurit pengawal saka Mahespati, purba wasesa tek serahna marang kowe. Gawanen bojone Maharsi karo Sapi Nandini ingon-ingone maring Mahespati!”


Sawisa ngendika kaja kuwe, Prabu Arjuna Sasrabahu jengkar sekang palenggahan, tindak maring kreta sing wis diparkir ora adoh karo padepokan, banjur kreta mlayu ninggalna padepokan Sambiharja.[ ana candake]

Artikel Candake : Sumpahe Rama Parasu -bagian 03
https://tamanrafflesia.blogspot.co.id/2016/06/wayang-kulit-banyumasan-sumpahe-rama_29.html